Европска ноќ на музеите 2017

Оваа манифестација се одржува во сите музеи во Франција и во сите европски музеи кои сакаат да партиципираат, а влезот на „Европска ноќ на музеите 2017“ е бесплатен за сите посетители.

Иван Мештровиќ, од мапата литографии (1), 1923 год

Оваа манифестација е поддржана од Министерството за култура и комуникации на Република Франција, Советот на Европа, ИКОМ, УНЕСКО, а е поддржана и од асоцијацијата Музеите во Франција, Федерацијата „Пријатели на музеите“, TV5MONDE, Radio France и други.

Националната галерија на Македонија во рамките на европската манифестација „Европска ноќ на музеите 2017“ ќе се претстави со изложбата „ИВАН МЕШТРОВИЌ, графики од Депоата на НГМ“, која ќе биде претставена во објектот Чифте амам од 18 – 31 мај 2017 година.

Изложбата ќе и понуди на македонската публика ретка можност да проследи оригинални литографии (21) од светскиот скулптор Иван Мештровиќ (1883 – 1962), овојпат претставен како цртач и графичар. Делата се составен дел од мапата литографии од 1923 и се сопственост на Националната галаерија на Македонија (од т.н. екс-југословенска збирка). Мапата ќе биде проследена и со презентација на 2 скулптури од уметникот, исто така сопственост на Националната галерија.

Изложбата има за цел да го претстави пред македонската публика цртачкото и графичкото мајсторство на скулпторот Иван Мештровиќ. Тоа е единствена прилика македонската јавност да ги види овие дела кои што за прв пат се изложуваат, а се дел од т.н. екс-југословенска збирка на некогашната Уметничка галерија „Скопје“, систематски собирана во втората половина на четириесеттите години на минатиот век. Ценејќи го реномето на Мештровиќ како светски признат уметник, сметаме дека изложбата ќе предизвика несекојдневен интерес.

Информации за нашето учество на европската манифестација „Европска ноќ на музеите 2017“ може да погледнете на следниот линк:

http://openagenda.com/ndm-2017-europe/events/ivan-mestrovic-prints-from-the-collection-of-the-national-gallery-of-macedoni

no comments

Read more...

Теута Хоџа Имери во Gallery MC New York

Во текот на месец април 2017 г. ќе се реализира проект кој е дел од годишната програма на Националната галерија на Македонија, во рамките на меѓународната соработка подржана од Министерството за култура на Р.М., во Македонскиот културен центар во Њујорк, САД (Gallery MC New York) ке биде отворена изложба на графики на уметницата Теута Хоџа Имери.

Teuta Cover

„Апстрактно конципираниот графички израз на Теута претставува авторефлексивна, автореферентна слика на жена-мајка, жена-сопруга и жена-творец. Во оваа тријада, таа се обидува да го актуелизира и прашањето за сопствениот идентитет во длабоко втемелената општествена хиерархија…

Уметноста на Теута Хоџа Имери без сомнение претставува лирска експресија на интимно доживеаното искуство. Секоја графика поединечно претставува тивка софистирана визуелна ламентација, која низ нејзините хронолошки емотивни состојби се прелева и прогресира од една графика во друга. Автобиографското писмо на Теута претставува визуелно преведување на нејзиниот личен став низ различните животни мени…“

no comments

Read more...

Изложба „Будење“ во Чифте амам

На 11 април (вторник), со почеток во 18:00 часот ќе биде отворањето на изложбата „Будење“ во Чифте амам – Национална галерија на Македонија.

budenje

За разлика од останатите, внатрешниот свет на децата со аутизам е неограничен, магичен. Толку искрен, чист, со енергија на која тешко може да се остане рамнодушен.

Аутистичните ни ја откриваат нивната стварност која за очите на останатите е често невидлива. Со нивните цртежи, тие на оригинален начин ни пренесуваат една порака: разбудете се, тука сме за да постоиме заедно! Затоа нам ни е потребно будење повеќе од кога било.

На умот, на душата, на внатрешниот глас, на вистинските вредности. Да подадеме рака и да станеме похумани, да се бориме против догмите и стереотипите од секој вид.Оттука, Националната галерија на Македонија, во соработка со здружението „ВО МОЈОТ СВЕТ“, ПОУ „Иднина“, Македонското научно здружение за аутизам и Ресурсниот центар на родители на деца со посебни потреби, со изложбата насловена „Будење“ го одбележува Светскиот ден на аутизмот.

Во една инспиративна креативна атмосфера на Чифте амамот беа организирани ликовни работилници на кои децата изработија преубави ликовни дела. Облачиња, сонца, срца или рачиња, сите до едно пленат со енергија и уметничка слобода што ни укажува за нивниот огромен творечки талент. Овие творби се одраз на нивната душа. Тие нè учат за љубовта, а за тоа не се потребни зборови. Овие деца се нашите херои!

Тенденцијата на пораст на аутизмот е факт и токму затоа е потребно подигање на јавната свест. Различни, а сепак толку исти, во несовршеноста е убавината. Сите заслужуваат да бидат прифатени и подеднакво третирани, само чистата љубов разбира сè!

Изложбата ќе трае до 20 април.

no comments

Read more...

Годишната програма на Националната галерија на Македонија

 

Националната галерија на Македонија за 2017 година ќе понуди мошне квалитетна Програма од областа на визуелните уметности, поточно ликовната дејност, издавачката дејност, истражувачки и едукативни проекти, меѓународната билатерална и мултилатерална соработка.

boris shemov mala stanica

Сигурни сме дека оваа Програма ќе ги исполни очекувањата на љубителите на уметноста и целокупната публика, различните таргетни групи, посетители, ќе даде исклучителен придонес во образовниот процес со што ќе се потврди улогата и значението на нашата институција.

Меѓу позначајните проекти најнапред да ги најавиме ретроспективните изложби на македонските автори, доајенот на македонската модерна уметност Никола Мартиноски, потоа Борко Лазески, Петар Мазев и македонската авторка која долг низ години живее и твори во Париз, Франција – Евгенија Демниевска.

Од богатата колекција на Националната галерија на Македонија, годинава ќе бидат реализирани три проекти: самостојна изложба на Љубомир Ивановиќ-Љуба, Иван Мештровиќ: Литографии и тематската изложба „Урбаниот предел како тематски предизвик (урбан предел-слика-документ)“, дела од повеќе автори во сопственост на Националната галерија на Македонија.

Значајни индивидуални и групни претставувања како: „Теорија: постконцептуални цртежи, 2015/2016“- самостојна изложба на Зоран Попоски, „Фотографијата во Македонија до Првата светска војна“, истражување и изложба - Душан Мандиќ (претставник на групата IRWIN) „Die Welt ist Schon“, изложба на Јасмина Цибиќ – една од позначајните словенечки уметници со европско реноме, претставник на Словенија на Венецијанското биенале 2013 година во соработка со Музејот на современа уметност од Загреб, потоа изложба на Дритон Селмани во соработка со Националната галерија на Косово, самостојна изложба на академскиот сликар Бурхан Ахмети, самостојна изложба на Бен Камили, Берлин – Германија, графики на Евгениј Пантев, изложба на Мухамедали Алили, Џезаир Реџепи, Нина Бале, Шќипе Мехмети, Хељидон Ѓерг, фотографии на Богдановска/Велиу и други проекти.

Во текот на 2017 година ќе се превземат подготвителни истражувачки проекти: подготовки за ретроспективни изложби на Танас ЛуловскиДраган Поповски – Дада и Костадин Танчев – Динка. Kако еден од најзначајните настани кои ги отпочнуваме годинава, а ќе се реализира догодина во рамките на одбележување на јубилејот-70 години Национална галерија на Македонија е изложба на светски познатиот Анри Сала.

Анри Сала е еден од најголемите уметници на денешницата, уметник со албанско потекло, стекнува образование, твори и живее во Франција. Реализирал многубројни изложби насекаде низ светот, негови дела се наоѓаат во колекции на најзначајни светски музеи и галерии, особено во приватни колекции на софистицирани колекционери на уметност. Ја претставуваше Франција, како национален претставник, на 56-то Венециско Биенале во 2013 година. Неговите дела, видеа, се поезија, зрачат со својата едноставност и ефективност, совршено концепциски и изведбено.

Едукативната програма за 2017 година е мошне плодотворна и таа опфаќа, покрај останатите проекти и работилници, и неколку веќе востановени, јубилејни младински изложби како: „Х младински пролетен салон“, Годишна изложба на основни училишта од Скопје која годинава ќе биде во знак на Петар Мазев и многу други. Покрај подршка на образовниот процес, присатна е општествената одговорност и хуманот аспект кај проектите „Будење“ – работилница со аутистични деца и работилницата со изложба во насока на одбележување на 3-ти декември, ден на лица со посебни потреби. Националната галерија на Македонија е единствена институција од областа на културата која редовно се вклучува во светските кампањи кои ги анимираат овие категории на лица и подигнување на јавната свест. Едукацијата и работилниците се реализираат подеднакво во сите три објекти во опремени едукативни катчиња.

Од меѓународната соработка за 2017 година ја издвојуваме патувачката изложба „Есенција на егзистенција“ која ќе се реализира во Националната галерија во Приштина и изложбата на Теута Хоџа Имери во Македонскиот културен центар во Њујорк, САД.

Посебно место мора да издвоиме за големите инвестициски зафати кои оваа година, благодарение на поддршката на Министерството за култура на Р. Македонија, ќе ги започне и превземе Националната галерија на Македонија како реконструкција на објектот Мала станица, реконструкција на објектот Чифте амам, Конзервација и реставрација на паркот на скулптури – Даут пашин амам, внатрешни техничко – безбедносни зафати и многу слични интервенции кои дополнително ќе го подигнат нивото, безбедноста, квалитетот и задоволството во проектите на Националната галерија на Македонија. Особено треба да се спомене конзервацијата и реставрацијата на збирките кои се дел од движното културно наследство на Спомен куќата на Лазар Личеноски.

no comments

Read more...

Aпстракцијата во современото македонско сликарство и скулптура

На 29 декември (четврток), во 12 часот, во објектот Чифте амам на Националната галерија на Македонија, ќе биде поставена изложбата „АПСТРАКЦИЈАТА ВО СОВРЕМЕНОТО МАКЕДОНСКО СЛИКАРСТВО И СКУЛПТУРА“.

1117. Хаџи Бошков Петар, Торзо, 1964

Изложбата ретроспективно ја елаборира појавата и развојот на апстрактната уметност во современото македонско сликарство и скулптура од периодот на шеесеттите години на минатиот век до денес, потенцирајќи ја притоа непредметната уметност (во сите нејзини варијации) како доминантен израз (и) во македонската ликовна уметност од втората половина на дваесеттиот век до денес. Едновремено изложбата има за цел да потсети на можеби подзаборавените македонски уметници фасцинирани од оваа визеулна приказна, чие што творештво засекогаш останува неразделен дел не само на апстрактниот исказ туку на македонската уметност во целина. Дури и денес, во поодминатите години на постмодерната и новите медиуми, непредметната уметност е се’ уште тука, околу нас и во ателјеата на македонските уметници, иако можеби не и’ посветуваме доволно внимание.

1061. Мишев, Слика XLIX, 1992,

Она што можеби треба веднаш да се потенцира е чувството дека македонската апстракција, во сите нејзини изразни форми, уште од самиот почеток па се’ до денес делува сигурно, самосвесно, автономно. Поточно, во најголем дел, појавата (и развојот) на апстрактната уметност кај нас е производ на нужност а не само афинитет, сосема спротивно на некои можни дилема дали таа воопшто може да му биде блиска на македонскиот уметник. Во забрзаното чекорење кон „достигнувањето на светот“ во педесеттите години на минатиот век апстракцијата секако била првиот, или меѓу првите, предизвици. Односно, кај нас таа беше и културолошки и творечки предизвик! Таа, непредметната уметност, во сите нејзини изразни форми бргу стана доминантен творечки исказ на македонската ликовна сцена во тоа време. И се одржа до денешен ден, можеби не со таа силина и опфат, можеби не со таа бројност на приврзеници односно следбеници, но се’ уште како интересен предизвик, дури и за помладите постмодерни генерации.

717. Мазев Петар, Изгорен пејзаж, 1963

На изложбата се претставени осумдесетина дела од повеќе македонски уметници од сите генерации, меѓу кои Петар Мазев, Димитар Аврамовски-Гуте, Петар Хаџи Бошков, Миле Корубин, Борис Николовски, Ордан Петлевски, Иван Велков, Јордан Грабулоски, Борко Лазески, Слободан Филовски, Танас Луловски, Татјана Миљовска, Златко Глигоров, Благоја Маневски, Решат Ахмети, Влатко Миладинов и др.

Автор на изложбата е Златко Теодосиевски.

no comments

Read more...

Ретроспективна изложба „Вангел Наумовски“

Ве информираме дека во Националната галерија на Македонија, објект Даут-пашин амам, на 23 декември 2016 година (петок), во 19 часот ќе се отвори ретроспективната изложба „Вангел Наумовски“. На изложбата ќе бидат изложени стотина дела од сите творечки фази на Вангел Наумовски.

Vangel Naumovski 4

Со името на охридскиот сликар Вангел Наумовски се поврзани повеќе епитети – тој кај нас и во светот е секогаш претставуван како уникатен пример на сликар на чудесниот свет на длабочините на езерото и комплексноста на космосот, на задоволството, жената и љубовта…

Неговите поетски слики со виртуозен потег го доловуваат светот на границата помеѓу сонот и јавето, меѓу земјата и космосот, царствата на растенијата и цвеќето, убавините на охридските нимфи.

Волшебните светови на соништата на Наумовски се раѓаат од неговиот однос кон природата, опкружувањето, традицијата, митовите и стилски и тематски заземаат издвоено и препознатливо место со специфичното хуманистичко и пантеистичко чувствување на светот и на човекот во него.

Се чини премалку да се каже дека сликарството на Вангел Наумовски се одликува со исклучителна препознатливост.

Иако самоук сликар, тој се вбројува помеѓу малиот број уметници од Македонија кои достигнуваат најголема афирмација и надвор од нашата земја уште за време на своите најактивни творечки години. Со автентичен и препознатлив ликовен израз надвор од уметничките трендови, секогаш актуелен, сензибилен и повеќестрано креативен, на почеток е забележан во историјата на македонската (и пошироко, на југословенската) ликовна уметност како најистакнат претставник на т.н. „наивна уметност“, определби што се менуваат подоцна заради констатациите за неговото тежнеење кон фантастичниот надреализам.

Изложбата ќе трае до 28 февруари 2017 година.

Vangel Naumovski 3

Vangel Naumovski 2

Vangel Naumovski 1

no comments

Read more...

Изложба ,,Мојот универзум ‘’ во Чифте амам

На 5 декември (понеделник) 2016 година, со почеток од 13 часот во објектот Чифте амам ќе биде отворена изложбата ,, Мојот универзум ‘’.

3 (2)

Преку оваа изложба Националната галерија на Македонија го одбележува Меѓународниот ден на лицата со посебни потреби. Во таа насока беа организирани ликовни работилници на кои се изработуваа дела на стакло и коноп. На овие креативни работилници учество земаа учениците од ДУЦОР ,,Партенија Зографски” и Гимназиите СУГЦ ,,Орце Николов’’ и СУГЦ ‘’Јосип БрозТито’’.

Преку моделот на Социјална инклузија се развива чуство на толеранција и почит кон различностите, а низ прекрасна дружба тие создадоа уметност. Имајќи го предвид значењето на оваа изложба особена чест и задоволство ќе биде таа да биде презентирана пред пошироката јавност, а воедно да биде поттик за подобар третман за лицата со посебни потреби.

2 (3)

1 (4) Screen Shot 2016-12-03 at 8.37.24 PM

Screen Shot 2016-12-03 at 8.37.02 PM

 

no comments

Read more...

Изложба на уметнички слики од македонски автори, наследени во процесот на сукцесија на поранешна СФРЈ

Во Национална галерија на Македонија, објект Мала станица, на 3 декември 2016 година, во 12 часот ќе се отвори изложбата Уметнички слики од македонски автори, наследени во процесот на сукцесија на поранешна СФРЈ.

MNR pokana mak

На изложбата се застапени 46 уметнички дела и се поголем дел на уметнички слики од македонски автори преземени како движен имот во сукцесијата која и припадна на Република Македонија, а чиј што пат дотука воопшто не беше лесен.

Овие дела, од наши македонски автори, долги години ги украсувале просториите на амбасадите, конзулатите и мисиите на СФРЈ, а подоцна и на поранешните југословенски републики, недостапни за пошироката јавност, секое на различна дестинација, далеку од матичната Македонија.

Овие 46 дела се донесени од над 20 различни држави. Некои од нив пропатуваа од најдалечните Мексико, Каракас, Перу, Токио, Њујорк за конечно повторно да се најдат тука во Македонија, онаму каде што припаѓаат. Меѓу останатите автори на изложбата се застапени дела и од авторите Мартиновски, Личеновски, Коџоман, Мазев, Кондовски, Куновски, Темкова, Хаџи Бошков, Перчинков и други, чија што работа оставила голема трага во македонската култура, создадени во периодот по Втората светска војна, дела кои досега не биле изложени за широката културна јавност, дела кои ќе го збогатат културното наследство на Република Македонија.

no comments

Read more...

Групна изложба “Конекција 2” во Мала станица

Во Националната галерија на Македонија, на 1 декември 2016 година (четврток), со почеток од 19:30 часот ќе биде отворена групната изложба “Конекција 2”.

konekcija-2

На оваа изложба со свои ликовни дела ќе се претстават авторите кои се од различни градови на Македонија: Зоран Мише (Охрид), Павел Целкоски (Охрид), Горан Тричковски (Делчево), Перица Георгиев (Скопје), Марјан Ѕин (Струмица), Иво Пецов (Виница), Слободан Милошески (Скопје), Маријана Иванова (Виница), Јана Луловска (Скопје) и Јовица Миленов (Делчево). Изложбата вклучува дела од различни ликовни области – графика, сликарство, вајарство, плакат и фотографија.

Да се биде дел од современото културно живеење, значи да се биде дел од едно ново глобално поврзување и комуницирање, предизвикано пред се’ од развојот на новите технологии и начини за комуницирање. Да се биде поврзан, да се биде “конектиран и онлајн” денес е неопходен услов да се биде видлив, препознаен, успешен. Во сите области на културата и уметноста, во ликовните уметности посебно, поврзувањето, вмрежувањето, вештината на комуницирањето е подеднакво важна, колку што е важно делото на авторот, неговата содржина и порака. На светот и човештвото воопшто, никогаш поважна и поургентна не му била нужноста, од поврзувањето и културното комуницирање на автори и творци од културата, кои културата ја разбираат како благородна и најдобра мисија за креирање на подобар живот. Една од најважните димензии од дефинициите за културата и уметноста е токму оваа, тие заедно можат да го менуваат и светот и векот, кон подобро.

Концептот “Конекција 2” се појави со иницијативата на директорот на Културно-информативниот центар на Р. Македонија во Софија, Васко Шутаров и наиде на позитивен прием од ликовните уметници кои се наоѓаа во Софија и изразија спремност да соработуваат со нашиот културен Центар. Беа претставени повеќе групни изложби во различен авторски состав во бугарските градови: Велико Трново, Благоевград, Русе, Пловдив, Стара Загора, Созопол, Харманли и во Софија.

Со изложбата во Мала станица, групата автори од “Конекција 2” кои живеат, работат или студираат во Софија се претставуват пред домашната публика, за да ги зацврстат и продлабoчат своите контакти со колегите и публиката во Скопје.

no comments

Read more...

Изложба „Омер Калеши – 55 години творештво“ во Чифте амам

Hа 01 декември 2016 година (четврток), со почеток во 12 часот, во НУ Национална галерија на Македонија, објект Чифте амам, во Скопје, ќе се одржи свеченост по повод донацијата на ликовни дела од познатиот уметник Омер Калеши на општина Чаир.

omer-kaleshi-bw

На изложбата под наслов „Омер Калеши – 55 години творештво“ ќе бидат претставни вкупно 24 подарени слики кои потекнуваат од најновиот творечки опус на авторот, а домашната публика ќе има можност да ги запознае веднаш по нивното претставување во Виена, Австрија.

НУ Национална галерија на Македонија ја организира оваа изложба во рамките на своите годишни програмски активности поддржани од страна на Министерството за култура на Република Македонија, а во соработка со Општина Чаир.

Маестро Омер Калеши е реномиран албански ликовен уметник во Европа и светот. Студирал во Истанбул на академијата Мимар Синан, а од 1956 година живее во Париз како слободен уметник.

Во рамките на неделата посветена на Омер Калеши, која ја чествува скопската општина Чаир, освен изложбата на подарени дела, на 02 декември 2016 година (петок), во 11 часот, на вториот ден од оваа манифестација, во галерискиот простор Чифте амам (дел од НУ Национална галерија на Македонија), авторот ќе оствари едукативна средба со децата од основните училишта од оваа општина, на која и најмладата генарација ќе ја запознае со своето творештво.

По претставувањето на изложбата во Чифте амам, на 06 декември 2016 година (вторник) истата ќе биде промовирана во Институтот за духовно и културно наследство на Албанците во Скопје, каде делата кои се во сопственост на Општина Чаир ќе бидат трајно изложени за јавност во вид на постојана поставка во Галеријата посветена на Омер Калеши.

Воедно, ја користиме оваа прилика да Ве поканиме да присуствувате на активностите по повод неделата посветена на творештвото на сликарот Омер Калеши.

no comments

Read more...