Афердита Кики изложува во Чифте амам

Во Националната галерија на Македонија, објект Чифте амам, на 21 октомври 2013 година (понеделник), во 19:30 часот, ќе се отвори изложба на Афердита Кики.

Уметноста што ја создава уметницата Афердита Кики плени со силната потреба за ликовно изразување. Едноставно, поседува свој свет на слобода. Со одредени комбинации на линии, боја, јазли, нишки, реси и облици ангажира директно, но и посредно. Кики е уметница со неверојатно изразени фактори на креативност, способност да апсорбира, способност да преобликува, да расчленува и да апстрахира. Оригинална во изразот и сензибилна во забележувањето, нè импресионира со креативната мисла и продлабочената емоционалност; бележења на непредвидливи физички и емоционални активности – апсорбирани чувства и емоции.

Низ историски и себесвојствен философски контекст го покажува сентимент и пиетет кон уметничкото минато. Делата ја вклучуваат временската димензија на гледање на уметничкото дело, со што и го соопштува својот став. Следиме метафори на духовни и морални состојби за значењето на традицијата и пред сè културниот идентитет. Афердита Кики создава уметност трагајќи по праисконското; понесена така, запловува во свет на трепетливоста на мисловната ангажираност за да предизвика ликовна возбуда и естетска радост.

Нејзините дела се самостојни и автентични исполнети со лирска разиграност и синтеза на современото со традиционалното.

Одговорен кустос на изложбата е Љупчо Маленков.

Изложбата ќе ја отвори г-а Халиде Палоши, директор на Националната галерија на Македонија.