Епизоди на модернизмот – избор од колекцијата на Вукмановиќ

Share Button

Hа 16 септември 2016 година (петок) во 20 часот во Националната галерија на Македонија, објект Мала станица, ќе се отвори изложбата Епизоди на модернизмот – избор од колекцијата на Вукмановиќ, дела од колекцијата на Народниот музеј на Црна Гора од Цетиње, Црна Гора, а кустос на изложбата е Љиљана Караџиќ.

5 mark chagall revolucija

Оваа изложба е дел од билатералната соработка на нашите две институции која се одвива неколку години по ред и годинава продолжи со изложбата „Есенција на егзистенција“ во организација на Националната галерија на Македонија која се отвори на 05.08.2016 година во Народниот Музеј на Црна Гора во Цетиње, а ова е повратна изложба од колекцијата на Народниот Музеј на Црна Гора која ќе се реализира во Националната галерија на Македонија – Мултимедијалниот центар Мала станица.

Изложбата на која се прикажани 27 автори (од кои повеќето се клучни имиња за историјата на југословенската модерна уметност: Ѓорѓе Андрејевиќ Кун, Стојан Аралица, Јанез Берник, Миодраг Дадо Ѓуриќ, Бранко Филиповиќ Фило, Лазар Личеноски, Петар Лубарда, како и светски познатите Марк Шагал, Ренато Гутусо и други…) има за цел да го понуди искуството на директна средба со поединечните дела кои визуелно, емотивно и мисловно се потикнувачки, но и да потсети на благородниот чин на Милица и Светозар Вукмановиќ – Темпо, кои со својот личен пример ги отелотворија верата во идеалот за напредок, историската мисија на модернитетот и неговите позитивни ефекти за човештвото.

Збирката на Милица и Светозар Вукмановиќ – Темпо, која содржи 224 дела (слики, скулптури, цртежи, графики, таписерии) од најважните југословенски уметници од првата половина на XX век, како и неколкумина странски автори, се создаваше во годините по Втората светска војна. Во 1965 година, ја подарија збирката на Цетиње, а градот потоа ја предаде на чување на Народниот музеј на Црна Гора, каде што се наоѓа и денес. Збирката нуди увид во идеите и тековите на југословенската уметност во петтата и во шестата деценија на 20 век, а може да се набљудува не само како многу прегледна историја на важните етапи на југословенскиот модернизам, туку и како збир на единствени индивидуални приказни, понекогаш на доминантните, а понекогаш паралелни на главните струи, пред, зад или надвор од официјалниот систем.

Share Button